मंगलवार, ९ असार, २०८३
मंगलवार, ९ असार, २०८३
राष्ट्रिय सन्देश संबाददाता, ४ घण्टा पहिले
२०८३ असार ०८, काठमाडौं । पाकिस्तानका प्रधानमन्त्री शाहबाज शरीफले स्विट्जरल्यान्डको बर्गेनस्टकमा 'इस्लामावाद समझदारी ज्ञापन' (Islamabad MoU) अन्तर्गत भएको पहिलो उच्चस्तरीय वार्ता सफलतापूर्वक सम्पन्न भएको बताएका छन् । अमेरिका र इरानबीचको तनाब कम गर्ने उद्देश्यले आयोजना गरिएको उक्त वार्ता सकारात्मक र अर्थपूर्ण वातावरणमा सम्पन्न भएको प्रधानमन्त्री शरीफले जानकारी दिएका हुन् ।
सामाजिक सञ्जाल 'एक्स' (ट्विटर) मा पोस्ट गर्दै प्रधानमन्त्री शरीफले वार्तामा उत्साहजनक प्रगति भएको उल्लेख गरेका छन् । वार्ताका क्रममा सहभागी देशहरूबीच आगामी ६० दिनभित्र अन्तिम सम्झौताका लागि स्पष्ट मार्गचित्र (रोडम्याप) तयार गर्ने सहमति भएको छ ।
यसका साथै, सम्झौताको राजनीतिक पर्यवेक्षण तथा अनुगमनका लागि एउटा उच्चस्तरीय समिति स्थापना गर्ने र आगामी दिनमा थप प्राविधिक वार्ताहरू तत्काल सुरु गर्ने विषयमा पनि सहमति जुटेको छ ।
प्रधानमन्त्री शरीफले अमेरिका र इरानका वार्ताकारहरूले देखाएको जिम्मेवारीपन र अर्थपूर्ण वार्ताप्रतिको प्रतिबद्धताको उच्च प्रशंसा गरेका छन् । साथै, उनले यो शान्ति प्रक्रियामा महत्वपूर्ण मध्यस्थकर्ताको भूमिका निर्वाह गर्ने देश कतार र बैठकको सफल आयोजना गर्ने आयोजक राष्ट्र स्विट्जरल्यान्डप्रति पनि विशेष आभार व्यक्त गरेका छन् ।
