शनिबार, १४ मंसिर, २०८२
शनिबार, १४ मंसिर, २०८२
राष्ट्रिय सन्देश संबाददाता, ४ घण्टा पहिले
२०८२ मंसिर १३, काठमाडौँ । एघारौँ महाधिवेशनका लागि नेकपा एमालेले आज देशैभरी प्रतिनिधि छनोट गर्दै छ । एमाले केन्द्रीय कार्यालयका अनुसार ११ गते सबै निर्वाचन क्षेत्रमा प्रतिनिधि निर्वाचनका लागि उमेदवारी मनोनयन भएको थियो ।
केही निर्वाचन क्षेत्रमा भने सहमति जुटेको छ । सहमति नजुटेका क्षेत्रहरूमा आज बिहान ८ बजेदेखि निर्वाचन हुँदै छ । निर्वाचनको समयमा अधिकांश क्षेत्रमा दिउँसो २ बजेसम्म निर्वाचन हुनेछ । विभिन्न जिल्लाहरूले अनुकुलता अनुसार मतदानको समय तय गरेको प्रचार विभाग प्रमुख राजेन्द्र गौतमले बताए ।
उनका अनुसार संघीय निर्वाचन क्षेत्रबाट खुला, महिला, दलित तथा युवासहित करिब दुई हजार प्रतिनिधि छनोट हुँदै छन् । प्रवास, जनसंगठन र विभागहरूबाट करिब एक सय प्रतिनिधि छनोट हुनेछन् । मनोनीतसहित एमालेको ११औँ महाधिवशेनमा करिब २२ सय प्रतिनिधि सहभागी हुनेछन् । प्रतिनिधि छनोटका लागि केन्द्रीय संगठन विभागले सिफारिस गरेको प्रस्तावलाई पार्टी सचिवालयले यसअघि पनि पास गरेर मातहतका कमिटीमा पठाइसकेको छ ।
एमालेको कात्तिक १५ गते बसेको केन्द्रीय सचिवालय बैठकले गरेको निर्णयानुसार प्रतिनिधिसभा निर्वाचन क्षेत्रलाई आधार मानी १२ सयबाट खुला दुई र महिला एक निर्वाचित गर्नुपर्नेछ । यसरी प्रतिनिधि छान्दा एकजना ४० वर्ष भन्दा कम उमेरको युवा अनिवार्य हुनुपर्नेछ । आठ सय सदस्यबाट एक प्रतिनिधि, जसमा महिला निर्वाचित गर्ने विधि तय गरिएको गौतमले जानकारी दिए ।
दलितका लागि प्रतिपाँच सय सदस्य एक प्रतिनिधि निर्वाचित गर्नुपर्ने प्रावधान छ । ट्रेड युनियनमा प्रदेशबाट सातजना प्रतिनिधि रहनेछन् । जनसंगठनबाट प्रतिजनसंगठन पाँचजनाको प्रतिनिधित्व रहनेछ । महासंघीय ढाँचामा रहेका जनसंगठनबाट भने सातजनाको प्रतिनिधित्व रहनेछ । विभाग र कार्यालयबाट एक/एकजनाको प्रतिनिधित्व रहनेछ । प्रवासबाट महादेशअनुसार पाँचजनाको प्रतिनिधित्व रहनेछ ।
केन्द्रीय कमिटीबाट ३५४ जना स्वतः प्रतिनिधि हुनेछन् । अनुशासन आयोगबाट २९, लेखा आयोगबाट ३०, निर्वाचन आयोगबाट २५, सल्लाहकार परिषद्बाट २५ जना प्रतिनिधि रहनेछन् । यी कमिटीबाट जम्मा ४६४ जना स्वतः प्रतिनिधि हुनेछन् ।
एमालेको कुल संगठित सदस्य संख्या ६ लाख ६७ हजार ६३० सदस्यमध्ये प्रदेशबाट ४५, प्रतिनिधिसभाको निर्वाचन क्षेत्रबाट करिब ९७०, विशेष जिल्लाबाट ४७, दलितबाट ८१, ट्रेड युनियनबाट ४९, प्रवास, केन्द्रीय विभाग र कार्यालय, जनसंगठनसहित गरी अनुमानित १९ सयभन्दा बढी प्रतिनिधि रहनेछन् । पाँच प्रतिशत प्रतिनिधि केन्द्रीय कमिटीले मनोनयन गर्नेछ । यी सबै जोड्दा कुल २१ सय भन्दा बढी प्रतिनिधि रहने एमालेले बताएको छ ।
तर, सचिवालयको पछिल्लो निर्णयले केही प्रतिनिधि थप हुने गरी पार्टी सदस्य संख्याको अनुपात घटाइएको थियो । त्यस अनुसार प्रतिनिधि छनोटको यो विधि सम्बन्धित कमिटीमा पठाइसकिएको एमालेले जनाएको छ ।
