बुधबार, ३० बैशाख, २०८३
बुधबार, ३० बैशाख, २०८३
राष्ट्रिय सन्देश संबाददाता, आईतवार, २७ बैशाख, २०८३
२०८३ बैशाख २७, काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) २०८२ को नतिजा सार्वजनिक गर्ने तयारी पूरा गरेको छ ।
बोर्डले आइतबार एक सूचना जारी गर्दै नियमित तथा ग्रेडवृद्धि परीक्षाको नतिजा सहज रूपमा विभिन्न सेवा प्रदायक संस्थाहरूमार्फत लिन सकिने बताएको छ । बोर्डले नतिजा प्रकाशित भएपछि परीक्षार्थी र अभिभावकहरूले एसएमएस, आइभीआर र आधिकारिक वेबसाइटहरूको माध्यमबाट आफ्नो विवरण प्राप्त गर्न सक्ने जनाएको छ ।
नतिजा हेर्नका लागि बोर्डले नेपाल टेलिकमको ‘१६००’ सर्टकोडमा एसएमएस, यूएसएसडी वा आइभीआर सेवा प्रयोग गर्न सकिने व्यवस्था मिलाएको छ । त्यसैगरी, जानकी टेक्नोलोजी प्रा.लि. को ‘३५००१’ र एम्बिसन गुरु प्रा.लि. को ‘३१०६१’ नम्बरमा एसएमएस गरेर पनि नतिजाको जानकारी लिन सकिने सूचनामा उल्लेख छ । प्रविधिको बढ्दो प्रयोगलाई ध्यानमा राख्दै बोर्डले डिजिटल माध्यमबाट नतिजा उपलब्ध गराउने प्रक्रियालाई प्राथमिकता दिएको हो ।
वेबसाइटमार्फत नतिजा हेर्न चाहनेहरूका लागि राष्ट्रिय परीक्षा बोर्ड र परीक्षा नियन्त्रण कार्यालयको आधिकारिक पोर्टलहरू लगायत अन्य विभिन्न निजी क्षेत्रका पोर्टलहरूलाई पनि अनुमति दिइएको छ । विद्यार्थीहरूले नेपाल टेलिकमको आधिकारिक नतिजा पोर्टल, कान्तिपुर पब्लिकेसन्स, इडियु सञ्जाल, खल्ती, कलेज इन्फो नेपाल र द कनेक्ट प्लस जस्ता १४ वटा विभिन्न वेबसाइटहरूबाट मार्कसिटसहितको नतिजा हेर्न सक्नेछन् । बोर्डले नतिजासम्बन्धी आधिकारिक र आधिकारिकता पुष्टि भएका स्रोतहरूबाट मात्र जानकारी लिन सबैमा अनुरोध समेत गरेको छ ।
