बिहीबार, १४ जेष्ठ, २०८३
बिहीबार, १४ जेष्ठ, २०८३
राष्ट्रिय सन्देश संबाददाता, ५८ मिनेट पहिले
२०८३ जेष्ठ १४, काठमाडौं । सरकारले विभिन्न देशका लागि राजदूत तथा स्थायी प्रतिनिधि नियुक्तिका लागि खुला प्रतिस्पर्धामार्फत आवेदन माग गरेको छ । परराष्ट्र मन्त्रालयले बिहीबार कार्यविधि बनाएर योग्य नेपाली नागरिकबाट आवेदन आह्वान गरेको हो ।
सुशासन (व्यवस्थापन तथा सञ्चालन) ऐन–२०६४ को दफा ४५ तथा राजदूत नियुक्ति निर्देशिका–२०७५ (२०७९ मा संशोधित) अनुसार आवेदन आह्वान गरिएको मन्त्रालयले जनाएको छ ।
हाल नेपालका १७ वटा कूटनीतिक नियोग प्रमुखविहीन छन् । खुला प्रतिस्पर्धाबाट भारत, चीन, अमेरिका, बेलायत, अष्ट्रेलिया, इजरायल, दक्षिण कोरिया, अष्ट्रिया, बहराइन, बङ्गलादेश, मलेसिया, ओमान र साउदी अरेबियालगायतका देशमा राजदूत नियुक्त गरिनेछ ।
कार्यविधि अनुसार राजदूत पद राजपत्राङ्कित विशिष्ट श्रेणीसरह मानिनेछ र उनीहरूको कार्यकाल चार वर्षको हुनेछ । सफल उम्मेदवारलाई कुन देशमा पठाइने भन्ने विषय भने कार्यशर्त (टीओआर) मा स्पष्ट गरिएको छैन ।
राजदूतका लागि आवेदन दिन अन्तर्राष्ट्रिय सम्बन्ध, राजनीति शास्त्र, कानुन, अर्थशास्त्र, सार्वजनिक प्रशासन वा सम्बन्धित विषयमा स्नातकोत्तर तह उत्तीर्ण गरेको हुनुपर्नेछ । त्यस्तै, आवेदक नेपाली नागरिक हुनुपर्ने, कम्तीमा ३५ वर्ष उमेर पुगेको हुनुपर्ने तथा कुनै विदेशी मुलुकको स्थायी वा अस्थायी बसोबास सुविधा नलिएको हुनुपर्ने व्यवस्था गरिएको छ ।
मन्त्रालयका अनुसार भ्रष्टाचार वा नैतिक पतन देखिने अपराधमा दोषी ठहर भएको व्यक्ति राजदूतका लागि अयोग्य हुनेछन् । नेपाल सरकारको सेवाबाट बर्खास्त नभएको, वैदेशिक सहायता प्राप्त गैरसरकारी संस्थामा कार्यरत नरहेको, प्रस्तावित देशसँग स्वार्थ नबाझिएको तथा उच्च नैतिक चरित्र भएको व्यक्तिले मात्र आवेदन दिन पाउनेछन् ।
राजदूतका लागि अङ्ग्रेजी भाषामा राम्रो दक्खल आवश्यक पर्ने र सम्बन्धित मुलुकको भाषा जान्नेलाई थप प्राथमिकता दिइने कार्यविधिमा उल्लेख छ ।
