बिहीबार, २० चैत्र, २०८१
बिहीबार, २० चैत्र, २०८१
राष्ट्रिय सन्देश संबाददाता, शनिबार, १६ बैशाख, २०८०
काठमाडौं । एसीसी प्रिमियर कप क्रिकेटको उपाधिका लागि नेपाल र युएई भिड्ने भएका छन् । सेमिफाइनल अन्तर्गतका आजका खेलहरु प्रभावित हुँदा नेपाल र युएईले फाइनलमा स्थान बनाए ।
नेपाल र कुवेतबीचको खेल वर्षाले प्रभावित भएपछि नेपाल समूह बिजेता भई सेमिफाइनल प्रवेश गरेका आधारमा सोझै फाइनलमा पुगेको छ भने युएईले डीएल मेथडका आधारमा २ रनको जित निकाल्दै फाइनलमा स्थान बनायो ।
कीर्तिपुरम मैदानमा बर्षाले प्रभाव पारेपछि खेल ४२ ओभरमा झारिएको थियो । जसमा नेपालले कुवेतलार्य २८१ रनको लक्ष्य दिएको थियो । तर जवाफी ब्याटिङमा उत्रिएको कुवेतले ८.३ ओभरमा ६ विकेट गुमाएर ३७ रन जोड्दा खेल वर्षाका कारण पुनः रोकिएको थियो ।
कुवेतले २० ओभरसम्म नखेलेका कारण डीएल प्रणालीबाट नतिजा निकाल्न नसक्दा यो खेल रद्द नै भयो । नेपाल समूह विजेताका हैसियतमा सेमिफाइनल पुगेकाले सोही नतिजाले फाइनलमा स्थान बनाउन पर्याप्त भयो ।
मूलपानी मैदानमा युएईले दिएको २३७ रनको लक्ष्य पछ्याएको ओमान डीएल मेथडमा २ रनले पछि परेको हो । ओमानले ४३ ओभरमा ६ विकेट गुमाएर १९० रन बनाउँदा पानी परेपछि अवरुद्ध भयो । डिएल मेथडमा हिसाव गर्दा युएईले ४३ ओभरमा १९३ रनको लक्ष्य पाएको थियो । जवाफमा ओमानले त्यति नै ओभरमा १९० रनमात्रै बनाउन सक्यो । अब उपाधिका लागि नेपाल र युएईले सोमबार त्रिवि क्रिकेट मैदानमा खेल्ने छन् । यो खेलको विजेताले एसियाकपमा स्थान बनाउने छ ।
