बुधबार, २४ भाद्र, २०८३
बुधबार, २४ भाद्र, २०८३
राष्ट्रिय सन्देश संबाददाता, बिहीबार, ११ भाद्र, २०८३
२०८३ भदौ ११ काठमाडौँ । प्रमुख प्रतिपक्षी दल नेपाली कांग्रेस संसदीय दलका नेता भीष्मराज आङ्देम्बेले भोटेकोशी नदीमा आएको भीषण बाढीबाट घाइते भई उपचाररत नागरिकको स्वास्थ्य अवस्थाबारे जानकारी लिएका छन् । आङ्देम्बेले बुधबार राति त्रिवि शिक्षण अस्पताल महाराजगञ्ज र ट्रमा सेन्टर पुगेर बाढीमा परी घाइते भएकाहरूलाई भेटेका हुन् ।
उनले उपचाररत घाइतेसँग भेट गरी उनीहरूको स्वास्थ्य अवस्था, उपचारको स्थिति र अस्पतालले उपलब्ध गराइरहेको सेवाबारे जानकारी लिएका थिए ।घाइतेहरूको अवस्था बुझ्दै आङ्देम्बेले विपद्को समयमा उपचारमा कुनै कमी हुन नदिन सरकारको ध्यानाकर्षण गराए । बाढीबाट घाइते भएका नागरिकको जीवनरक्षा र उपचार सरकारको पहिलो प्राथमिकतामा हुनुपर्नेमा उनले जोड दिए ।
उनले घाइतेहरूको उपचारमा आवश्यक पर्ने औषधि, स्वास्थ्य सेवा तथा अन्य व्यवस्थापनमा कुनै समस्या भए तत्काल समाधान गर्न सरकारसँग आग्रह गरे ।
आङ्देम्बेले घाइतेहरूको शीघ्र स्वास्थ्य लाभको कामनासमेत गरे । उनले बाढीका कारण भएको जनधनको क्षतिप्रति दुःख व्यक्त गर्दै विपद्को यस कठिन घडीमा पीडित नागरिकको साथमा नेपाली कांग्रेस रहेको बताए ।
आङ्देम्बेले उद्धार, राहत र उपचारका लागि सरकारलाई आवश्यक सहयोग गर्न नेपाली कांग्रेस तयार रहेको पनि बताए ।
