शनिबार, १ कार्तिक, २०८३
शनिबार, १ कार्तिक, २०८३
राष्ट्रिय सन्देश संबाददाता, २ घण्टा पहिले
२०८३ कार्तिक ०१ काठमाडौँ । प्रधानमन्त्री बालेन्द्र शाहले बडादसैँको अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइमा सुख, शान्ति, सुस्वास्थ्य, आरोग्य र समृद्धिको शुभकामना व्यक्त गरेका छन् ।
बडादसैँका अवसरमा शुभकामना सन्देश जारी गर्दै प्रधानमन्त्री शाहले दसैँले विश्वभर छरिएर रहनुभएका नेपाली समुदायलाई एकताबद्ध गर्ने विश्वास व्यक्त समेत गरेका छन् । उनले दसैँलाई धार्मिक, सामाजिक तथा सांस्कृतिक महत्त्व बोकेको एकता, आत्मीयता र पारिवारिक मिलनको पर्वका रूपमा उल्लेख गर्नुभएको छ।
टीका र जमरा ग्रहण गरी ठूलाबाट आशीर्वाद लिने तथा सानालाई माया र ठूलालाई आदर गर्ने परम्पराले नेपाली समाजको मौलिक संस्कृतिलाई प्रतिबिम्बित गर्ने उनले बताएका छन् ।
यस वर्ष रसुवा, नुवाकोट, गोरखालगायतका जिल्लामा भएका प्राकृतिक विपद्का कारण उत्पन्न शोक र क्षतिप्रति दुःख व्यक्त गर्दै प्रधानमन्त्री शाहले ज्यान गुमाउनुभएकाहरूप्रति श्रद्धाञ्जली अर्पण गरे । उनले शोकसन्तप्त परिवारजनमा गहिरो समवेदना व्यक्त गर्दै घाइतेहरूको शीघ्र स्वास्थ्यलाभको कामना गर्नुभएको छ। साथै, विपद्बाट विस्थापित नागरिकको पुनःस्थापनाका लागि सरकारले काम गरिरहेको जानकारी दिए ।
प्रधानमन्त्री शाहले दसैँलाई असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीकका रूपमा व्याख्या गर्दै प्रत्येक व्यक्तिले आफूभित्र रहेका काम, क्रोध, लोभ, ईर्ष्या र अहङ्कारजस्ता प्रवृत्तिमाथि विजय प्राप्त गर्नुपर्ने बताए । उनले समाजमा सत्य, सदाचार र सकारात्मक सोचको विकास गर्नुपर्नेमा जोड दिए ।
चाडपर्वका बेला गाउँघरका घरआँगन उजाडिँदै गएको तथा रोजगारी र जीविकोपार्जनका लागि ठूलो सङ्ख्यामा नेपाली विदेशिन बाध्य भएको अवस्थाप्रति चिन्ता व्यक्त गर्दै उनले आर्थिक बाध्यताका कारण दसैँजस्तो महान् पर्व कसैका लागि बोझ बन्न नहुने बताए।
हरेक नागरिकको आर्थिक सम्पन्नताले चाडपर्वको रौनक बढाउने उल्लेख गर्दै प्रधानमन्त्री शाहले देशको समृद्धि, नागरिकको सुखद जीविकोपार्जन र सुशासनका लागि सरकार प्रतिबद्ध रहेको जानकारी जानकारी दिए ।
सत्यको विजयको सन्देशलाई व्यवहारमा उतार्दै सुशासनको मार्गमा अघि बढ्न माता दुर्गाभवानीबाट सबैलाई प्रेरणा मिलोस् भन्ने कामना गर्दै उहाँले सभ्य र भव्य रूपमा बडादसैँ मनाउन सबैमा आग्रह गरे ।
प्रधानमन्त्री शाहले माता दुर्गाभवानीले सबैको रक्षा गरून् भन्दै सम्पूर्ण नेपालीको जीवनमा सुख, शान्ति र समृद्धि छाओस् भन्ने शुभेच्छा व्यक्त गरेका छन् ।
