आईतवार, १४ भाद्र, २०८३
आईतवार, १४ भाद्र, २०८३
राष्ट्रिय सन्देश संबाददाता, २ घण्टा पहिले
२०८३ भदौ १४ काठमाडौँ । रसुवाको भोटेकोशी क्षेत्रमा आएको विनाशकारी बाढीका कारण हालसम्म ७३४ जनाको शव फेला परेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले विभिन्न जिल्लाका नदी तटीय क्षेत्रहरूबाट मानव अङ्गहरूसहित ७३४ जनाको शव संकलन गरिएको जानकारी दिएको छ ।
प्राधिकरणका अनुसार मृतकमध्ये रसुवामा १३, नुवाकोटमा ५२, धादिङमा ५०, गोरखामा ५८, नवलपरासी पूर्वमा १८४, नवलपरासी पश्चिममा ८२, तनहुँमा ३६ र चितवनमा २५९ जनाको शव संकलन गरिएको छ ।
२ हजार ४९८ जना अझै सम्पर्कविहीन भएको जनाएको हो । सम्पर्कविहीन हुनेमा जलविद्युत् आयोजनाबाट ९३३ जना, रसुवाबाट ५६२ जना, नुवाकोटबाट ११५ जना, मकवानपुरबाट ६५ जना, सम्पर्कविहीन विदेशी नागरिक ५८९ जना, प्रहरी २७ जना, सेना ४५ जना, सशस्त्र प्रहरी १३ जना, भन्सार कार्यालय १५ जना, अध्यागमन कार्यालय ४ जना, नेपाल घुम्न आएका विदेशमा बस्ने नेपाली नागरिक १२७ जना, लाङटाङ राष्ट्रिय निकुञ्जका ३ जना रहेको प्राधिकरणले जनाएको छ ।
खोज तथा उद्धारका लागि १९ हजार ८९५ सुरक्षाकर्मी परिचालन गरिएको छ । हालसम्म ८ हजार १८६ जनाको उद्धार गरिएको प्राधिकरणले जनाएको छ । जलविद्युतको सुरुङबाट शुक्रबार १९१ र शनिबार ८८ जनाको उद्धार भएको बताइएको छ । हालसम्म २२७ जना विदेशी नागरिकको हेलिकोप्टरबाट उद्धार गरिएको छ ।
