मंगलवार, ३१ असार, २०८२
मंगलवार, ३१ असार, २०८२
राष्ट्रिय सन्देश संबाददाता, शनिबार, २८ असार, २०८२
२८ असार २०८२, काठमाडौं । सभामुख देवराज घिमिरेले गणतान्त्रिक व्यवस्थाको सफल कार्यान्वयनमा राजनीतिक दलको भूमिका अपरिहार्य रहेको बताएका छन् ।
शनिबार राजधानीमा आयोजित ‘शक्ति राष्ट्रहरूका राजनीतिक दलहरू तुलनात्मक अध्ययन’ पुस्तक विमोचन तथा पुस्तक चर्चा कार्यक्रममा बोल्दै सभामुख घिमिरेले विश्वका विभिन्न राजनीतिक संरचनामध्ये गणतन्त्रात्मक अथवा प्रजातान्त्रिक व्यवस्था सबैभन्दा उत्कृष्ट रहेको धारणा राखेका हुन् ।
उनले भने, ‘विश्वका विभिन्न राजनीतिक संरचनामध्ये गणतन्त्रात्मक अथवा प्रजातान्त्रिक व्यवस्था सबैभन्दा उत्कृष्ट हो । यो व्यवस्थाको मेरुदण्ड भनेकै राजनीतिक दल हुन् । दलहरूले व्यवस्था सुदृढ गर्ने, जनताले महसुस गर्न सक्ने सेवा र डेलिभरी दिन सक्ने, र मानव जातिलाई प्रगतिको दिशामा लाने माध्यमको रूपमा काम गर्ने गर्छन् ।’
यसैगरी घिमिरेले संसद र राजनीतिक दलबीचको सम्बन्धलाई स्पष्ट पार्दै राजनीतिक दलहरू संसदमार्फत नीति निर्माणमा सक्रिय रहनुपर्ने बताए । उनले भने, ‘संसदमार्फत राजनीतिक दलले नीति निर्माणमा भूमिका खेल्ने गर्छन् । चाहे शासन प्रणाली पूँजीवादी होस् वा समाजवादी, संसदले सरकार गठन, कार्यकारी भूमिकाको निगरानी तथा न्याय प्रदान गर्ने संरचना जस्ता महत्वपूर्ण जिम्मेवारीहरू वहन गर्छ ।’
घिमिरेले संसदलाई लोकतान्त्रिक शासनको मूल आधारका रूपमा व्याख्या गर्दै राजनीतिक दलहरूले त्यसलाई मजबुत बनाउन निर्णायक भूमिका खेल्ने धारणा राखे ।
