आईतवार, २८ असार, २०८३
आईतवार, २८ असार, २०८३
राष्ट्रिय सन्देश संबाददाता, २ घण्टा पहिले
२०८३ असार २८, काठमाडौँ । कुवेतस्थित नेपाली राजदूतावासले कुवेत तथा इराकमा रहेका नेपाली नागरिकलाई पछिल्लो सुरक्षा अवस्थालाई ध्यानमा राख्दै उच्च सतर्कता अपनाउन आग्रह गरेको छ । दूतावासले सार्वजनिक सूचना जारी गर्दै आधिकारिक स्रोतबाट प्राप्त जानकारीलाई मात्र आधार बनाउन र अपुष्ट सूचनाबाट सचेत रहन अनुरोध गरेको हो ।
दूतावासले सामाजिक सञ्जालमार्फत फैलिने भ्रमपूर्ण सूचना, अफवाह वा असत्य सामग्रीको प्रसार नगर्न नेपाली नागरिकलाई आग्रह गरेको छ । साथै, सम्बन्धित मुलुकको कानुन तथा सरकारी निर्देशन विपरीत हुने कुनै पनि गतिविधिमा संलग्न नहुन पनि सचेत गराइएको छ ।
कुवेत सरकारका सुरक्षा सम्बन्धी सूचनाहरूको पालना गर्न आग्रह गर्दै दूतावासले सम्भावित हवाई आक्रमण, प्रतिरक्षा गतिविधि वा त्यस्ता घटनासँग सम्बन्धित तस्बिर तथा भिडियो खिचेर सार्वजनिक नगर्न विशेष अनुरोध गरेको छ ।
सुरक्षा जोखिम देखिएको अवस्थामा अपरिचित वा शंकास्पद वस्तुबाट टाढा रहन, आपत्कालीन साइरन बजेको समयमा खुला स्थानमा भए नजिकको सुरक्षित भवनमा प्रवेश गर्न तथा भवनभित्र रहँदा झ्याल, सिसा र बार्दली आसपास नबस्न भनिएको छ ।
दूतावासले आवश्यक परेमा कन्सुलर सेवा तथा अन्य सहयोगका लागि नेपाली नागरिकलाई राजदूतावाससँग प्रत्यक्ष सम्पर्कमा रहन आग्रह गरेको छ । पछिल्लो संवेदनशील परिस्थितिमा संयमता अपनाउँदै स्थानीय प्रशासनका निर्देशन पालना गर्नसमेत अनुरोध गरिएको छ ।
