सोमबार, ५ आश्विन, २०८३
सोमबार, ५ आश्विन, २०८३
राष्ट्रिय सन्देश संबाददाता, १० घण्टा पहिले
२०८३ असोज ०४ जुम्ला । रसुवाको भोटेकोशी बाढीमा परी बेपत्ता भएका जुम्लाको पातारासी गाउँपालिका–५ का १० जनाको कुशको शव बनाएर सामूहिक रूपमा अन्त्येष्टि गरिएको छ । पातारासी नदीको किनारमा १० जनाको सामूहिक दाहसंस्कार गरिएको गाउँपालिका उपाध्यक्ष जनमाया रोकायाले बताइन ।
रसुवास्थित हाँकुबेँसी हाइड्रोपावरमा लामो समयदेखि काम गर्दै आएका पातारासीका स्थानीय गत भदौ १० को बाढीमा परी बेपत्ता भएका उपाध्यक्ष रोकायाले उल्लेख गरिन । उनका अनुसार पातारासीका मात्रै ४९ जना सम्पर्कविहीन भएका छन् ।
पातारासी गाउँपालिका–५ स्थित माथिलोर्पा गाउँका १० जनाको शनिबार दाहसंस्कार गरिएको छ । तलीलोर्पा गाउँका दुई जनाको आज दाहसंस्कार गरिएको उक्त वडाका स्थानीय अगुवा भक्त बुढाले बताए ।
भोटेकोशी बाढीले पुर्याएको क्षतिले पातारासीपूरै शोकमा डुबेको छ । बाढी आएको यतिका दिन भइसक्दा पनि आफन्तको कुनै खबर परिवारले नपाएपछि अन्ततः शवको प्रतिकका रूपमा कुशको आकृति बनाएर अन्तिम संस्कार गरिएको पातारासी-५ का स्थानीय कृष्ण बुढाले बताए ।
प्रमुख जिल्ला अधिकारी तेजप्रकाश प्रसाईँले बेपत्ताको खोजी जारी रहेपनि लामो समयसम्म कुनै खबर नआउँदा परिवारजन निराश र पीडामा रहेका बताए ।
भोटेकोशी नदीमा गएको बाढीमा परी जुम्लाका ९३ सम्पर्कविहीन भएकामा हालसम्म ३० जना सम्पर्कमा आएका छन् । बाँकी ६३ जना अझै सम्पर्कविहीन रहेका उनले जानकारी दिए ।
