शनिबार, २७ असार, २०८३
शनिबार, २७ असार, २०८३
राष्ट्रिय सन्देश संबाददाता, १६ घण्टा पहिले
२०८३ असार २७, काठमाडौँ । पूर्व विजेता स्पेन १६ वर्षको लामो प्रतीक्षा समाप्त गर्दै फिफा विश्वकप फुटबलको सेमिफाइनलमा प्रवेश गरेको छ ।
लस एञ्जलस स्टेडियममा शनिबार बिहान सम्पन्न निकै रोमाञ्चक र प्रतिस्पर्धात्मक क्वाटरफाइनल खेलमा बेल्जियमलाई २-१ गोल अन्तरले पराजित गर्दै स्पेनले अन्तिम चारमा आफ्नो स्थान सुरक्षित गरेको हो । सन् २०१० मा विश्वकपको उपाधि जितेयता स्पेनका लागि यो नै सबैभन्दा ठूलो सफलता हो ।
सन् २०१० को विश्वविजेता बनेपछि स्पेनको विश्वकप यात्रा सुखद रहन सकेको थिएन। सन् २०१४ को विश्वकपमा स्पेन समूह चरणबाटै बाहिरिएर स्तब्ध बनेको थियो भने सन् २०१८ र २०२२ का संस्करणहरूमा अन्तिम १६ को खेलभन्दा अगाडि बढ्न सकेको थिएन । तर, यसपटक भने पुरानो लयलाई सुधार्दै र मैदानमा उत्कृष्ट फुटबल प्रदर्शन गर्दै स्पेनले सेमिफाइनलको टिकट काटेको छ ।
शनिबारको खेलमा स्पेनलाई जिताउन फेबियन रुइज र मिकेल मेरिनोले एक-एक गोलको योगदान दिए । बेल्जियमका तर्फबाट चार्ल्स डे केटलेरले एक गोल फर्काए पनि टोलीलाई हारबाट जोगाउन त्यो पर्याप्त हुन सकेन ।
खेलको सुरुवातदेखि नै आक्रामक बनेको स्पेनका लागि ३०औँ मिनेटमा फेबियन रुइजले उत्कृष्ट गोल गर्दै टोलीलाई सुरुवाती अग्रता दिलाएका थिए । तर, स्पेनको त्यो खुसी धेरै समय टिक्न पाएन । खेलको ४१औँ मिनेटमा बेल्जियमका युवा स्टार चार्ल्स डे केटलेरले गोल गर्दै खेललाई १–१ गोलको रोमाञ्चक बराबरीमा ल्याए ।
पहिलो हाफ १-१ गोलको बराबरीमा सकिएपछि दोस्रो हाफमा दुवै टोलीले गोलका थुप्रै अवसरहरू सिर्जना गरे पनि फिनिसिङमा चुकेका थिए । खेल अतिरिक्त समयतर्फ धकेलिने सम्भावना बढिरहेका बेला ८८औँ मिनेटमा मिकेल मेरिनोले निर्णायक गोल गर्दै स्पेनलाई २–१ को महत्त्वपूर्ण जित दिलाए ।
निर्धारित समय सकिनै लाग्दा भएको यो गोल नै बेल्जियमका लागि घातक साबित भयो ।
