बुधबार, १० असार, २०८३
बुधबार, १० असार, २०८३
राष्ट्रिय सन्देश संबाददाता, १७ घण्टा पहिले
२०८३ असार ०९, काठमाडौं । कप्तान लियोनल मेस्सीको उत्कृष्ट लय र ऐतिहासिक कीर्तिमानको मद्दतमा साविक विजेता अर्जेन्टिना जारी फिफा विश्वकप २०२६ को नकआउट चरणमा प्रवेश गरेको छ । नेपाली समय अनुसार आज सम्पन्न समूह ‘जे’ को रोमाञ्चक खेलमा अर्जेन्टिनाले युरोपेली प्रतिद्वन्द्वी अष्ट्रियालाई २-० गोलअन्तरले पराजित गर्दै अन्तिम १६ मा आफ्नो स्थान सुरक्षित गरेको हो ।
अमेरिकाको डालासस्थित स्टेडियममा भएको उक्त खेलमा अर्जेन्टिनाले सुरुदेखि नै खेललाई आफ्नो नियन्त्रणमा राखेको थियो । खेलको ३८औँ मिनेटमा कप्तान लियोनल मेस्सीले आकर्षक गोल गर्दै अर्जेन्टिनालाई सुरुवाती अग्रता दिलाएका थिए ।
त्यसपछि पहिलो हाफमा थप गोल हुन सकेन। खेलको दोस्रो हाफमा अष्ट्रियाले बराबरी गर्ने केही प्रयास गरे पनि अर्जेन्टिनी रक्षापङ्क्तिले त्यसलाई असफल तुल्याइदियो । खेलको दोस्रो हाफको अतिरिक्त समय अर्थात् इन्जुरी समयमा मेस्सीले व्यक्तिगत दोस्रो गोल गरेपछि अर्जेन्टिनाको जित सुनिश्चित भएको थियो ।
यो खेल मेस्सी र विश्व फुटबल इतिहासकै लागि ऐतिहासिक बनेको छ। अष्ट्रियाविरुद्धको दुई गोलसँगै ३९ वर्षीय मेस्सीले विश्वकप इतिहासमा आफ्नो कुल गोल सङ्ख्या १८ पुर्याएका छन् ।
यससँगै उनले जर्मनीका पूर्व चर्चित स्ट्राइकर मिरोस्लाभ क्लोजको नाममा रहेको १६ गोलको ऐतिहासिक कीर्तिमानलाई पछि पार्दै विश्वकप इतिहासमा सर्वाधिक गोल गर्ने सर्वकालीन शीर्ष खेलाडीको कीर्तिमान आफ्नो नाममा लेखाउन सफल भएका छन् । यस सूचीमा १५ गोलसहित ब्राजिलका रोनाल्डो नाजारियो तेस्रो स्थानमा रहेका छन् ।
मेस्सीले यसअघि अल्जेरियाविरुद्धको पहिलो खेलमा सानदार ह्याट्रिक गरेका थिए । जारी विश्वकपका दुई खेलमा मात्रै उनको कुल गोल सङ्ख्या ५ पुगिसकेको छ, जसले उनलाई यस संस्करणको ‘गोल्डेन बुट’ को बलियो दाबेदार समेत बनाएको छ ।
लगातार दोस्रो जितसँगै अर्जेन्टिना समूह ‘जे’ मा ६ अंक जोड्दै तालिकाको शीर्ष स्थानमा रहेर नकआउट चरण पुग्ने पहिलो टोली बनेको छ । पराजित अष्ट्रिया भने दुई खेलबाट एक जित र एक हारसहित ३ अंक जोडेर दोस्रो स्थानमा कायम छ ।
यसै समूहमा रहेका जोर्डन र अल्जेरियाले समान एक-एक खेल खेलेका छन् र दुवै टोली अहिलेसम्म अंकविहीन छन् । अर्जेन्टिनाले अब समूह चरणको आफ्नो अन्तिम खेलमा जोर्डनको सामना गर्नेछ भने नकआउटको सम्भावना जीवितै राख्न अष्ट्रियाले अल्जेरियासँग प्रतिस्पर्धा गर्नेछ ।
