सोमबार, ११ श्रावण, २०८३
सोमबार, ११ श्रावण, २०८३
राष्ट्रिय सन्देश संबाददाता, शनिबार, ९ श्रावण, २०८३
२०८३ साउन ०९, काठमाडौँ । नेपाल राष्ट्र बैंकले भुक्तानी सेवा प्रदायक संस्थाहरूका लागि ‘वालेट’ खोल्ने तथा प्रयोगकर्ताको विवरण अद्यावधिक गर्ने प्रक्रियामा राष्ट्रिय परिचयपत्रलाई अनिवार्य गर्दै भुक्तानी प्रणालीसम्बन्धी एकीकृत निर्देशिकामा १५औँ संशोधन गरेको छ । राष्ट्र बैंकको भुक्तानी प्रणाली विभागले शुक्रबार परिपत्र जारी गर्दै नयाँ व्यवस्थाबारे जानकारी गराएको हो ।
संशोधित व्यवस्थाअनुसार अब भुक्तानी सेवा प्रदायक अनुमतिप्राप्त संस्थाहरूले नेपाली नागरिकको हकमा राष्ट्रिय परिचयपत्रको विद्युतीय अभिलेखसँग विवरण यकिन गरेर मात्र वालेट खाता खोल्नुपर्नेछ । साथै, आगामी असोज मसान्तभित्र आफ्ना प्रयोगकर्ताहरूसँग राष्ट्रिय परिचयपत्र भए-नभएकोबारे मोबाइल एप वा अन्य उपयुक्त माध्यमबाट स्वघोषणा लिनुपर्ने जिम्मेवारी पनि संस्थाहरूलाई दिइएको छ ।
त्यस्तै, राष्ट्रिय परिचयपत्र बनाइसकेका नागरिकले २०८३ असोज मसान्तभित्रै आफ्नो वालेटमा परिचयपत्र नम्बर अद्यावधिक गरिसक्नुपर्नेछ । परिचयपत्र नबनाएका प्रयोगकर्ताका हकमा भने नागरिकता वा अन्य कागजातबाटै वालेट खोल्न सकिने भए पनि परिचयपत्र बनाएपछि विवरण अद्यावधिक गर्न संस्थाहरूले प्रत्येक महिना सम्झाउनुपर्ने व्यवस्था गरिएको छ ।
विदेशमा बस्ने नेपालीहरूका लागि भने अनलाइनमार्फत कागजात पेस गरी वालेट खोल्ने सुविधा यथावत् राखिएको छ, यद्यपि उनीहरू नेपाल फर्किएको छ महिनाभित्र राष्ट्रिय परिचयपत्रको विवरण अद्यावधिक गरिसक्नुपर्नेछ ।
यसैगरी, आफ्नो हेरचाह आफैं गर्न नसक्ने अशक्त तथा असहाय नागरिकका हकमा भने राष्ट्रिय परिचयपत्र नभए पनि अन्य आवश्यक कागजातका आधारमा वालेट खोल्न र कारोबार गर्न सकिने लचिलो व्यवस्था गरिएको छ ।
