आईतवार, २८ भाद्र, २०८३
आईतवार, २८ भाद्र, २०८३
राष्ट्रिय सन्देश संबाददाता, शुक्रबार, १२ भाद्र, २०८३
२०८३ भदौ १२ काठमाडौँ । रसुवामा हालै आएको बाढीका कारण अलपत्र परी सकुशल उद्धार गरिएका २१ जना भारतीय तीर्थयात्रीहरू शुक्रबार स्वदेश फर्किएका छन् । भारतको तमिलनाडु राज्यका ती नागरिकहरूलाई स्वदेश फर्किएलगत्तै नयाँ दिल्लीमा भारतीय विदेशमन्त्री एस जयशंकरले भव्य स्वागत गरेका थिए ।
सो क्रममा उद्धार गरिएका तीर्थयात्रीहरूले नेपालमा बाढीपछि सामना गर्नुपरेको कठिन परिस्थिति र उद्धारको अनुभव विदेशमन्त्री जयशंकरसामु सेयर गरेका थिए । भारतीय नागरिकहरूलाई तीव्र र सुरक्षित रूपमा उद्धार गरी स्वदेश फर्काउने वातावरण मिलाएकोमा विदेशमन्त्री जयशंकरले नेपाल सरकारप्रति आभार व्यक्त गरेका छन् ।
उनले सामाजिक सञ्जाल 'एक्स' (ट्विटर) मार्फत विशेष गरी विपद्को जोखिमपूर्ण अवस्थामा खटिएका नेपाली सुरक्षाकर्मीहरूको उच्च प्रशंसा गर्दै धन्यवाद दिएका छन् । रसुवा बाढीपछि हालसम्म १२१ जना विदेशी नागरिकको सकुशल उद्धार भइसकेको छ, जसमा भारतका मात्रै ८५ जना रहेका छन् ।
बाढी आएलगत्तै भारतका १७८ जना तीर्थयात्रीहरू सम्पर्कविहीन भएका थिए । तीमध्ये केहीको उद्धार भइसकेको छ भने बाँकी रहेका अन्य नागरिकहरूको खोज तथा उद्धार कार्य अझै जारी रहेको छ ।
