शुक्रबार, २६ पुष, २०८१
शुक्रबार, २६ पुष, २०८१
राष्ट्रिय सन्देश संबाददाता, मंगलवार, १६ जेष्ठ, २०८०
रुपन्देही । बुटवलको बमघाटबाट पाल्पाको वसन्तपुरसम्म चल्ने लुम्बिनी केबलकार सोमबारदेखि सञ्चालनमा आएको छ ।
बुटवल उपमहानगर र पाल्पाको तिनाउ गाउँपालिका —३ मा पर्ने ऐतिहासिक तथा पुरातात्विक क्षेत्र बसन्तपुर जोड्ने लुम्बिनी केबलकार निर्माणको काम सकिएपछि सञ्चालनमा आएको हो ।
२०७७ फागुन १ गते तत्कालीन प्रधानमन्त्री केपी शर्मा ओलीले शिलान्यास गरेको केबलकार एक वर्षभित्र सञ्चालनमा ल्याउने भनिए पनि कोराेना महामारीको असरका कारण निर्धारित समयभन्दा केही ढिला सञ्चालनमा आएको हो ।
सोमबार केबलकारको बटम स्टेशनमा पण्डितहरुबाट धार्मिक विधिअनुसार पूजा आराधना गरेपछि केबलकार सञ्चालन सुरु भएको हो । बुटवलको वडा नं ३ मा बटम स्टेशन र पाल्पाको तिनाउ गाउँपालिका वडा नं ३ वसन्तपुरमा टप स्टेशन रहेको केबलकार २ दशमलव ६ किलोमिटरको दुरी रहेको छ । बटम स्टेशनबाट १० मिनेटमा टप स्टेशनमापुग्न सकिन्छ ।
एउटा गोण्डालामा आठ जना यात्रा गर्न मिल्ने २५ वटा गोण्डाला रहेको केबलकारले दैनिक ६ हजार यात्रुलाई ओसारपसार गर्न सक्ने लुम्बिनी केबलकारका अध्यक्ष ढकालले बताए ।
केबलकारको टप स्टेशन बसन्तपुरमा कामाख्या देवीको आकर्षक मन्दिर बनाइएको छ । कामाख्यादेवी मन्दिर र बसन्तपुरको चिसो हावापानीले विशेष गरी भारतीय पर्यटक र हिन्दु धर्मावलम्बीलाई आकर्षित गर्ने अध्यक्ष ढकालले बताए ।
टप स्टेशनमा पाँचतारे होटल र क्यासिनो बनेपछि दैनिक ५ हजार भारतीय पर्यटक भित्र्याउने लक्ष्य रहेको अध्यक्ष ढकालले बताए ।तल्लो स्टेसन समुद्री सतहबाट २३० मिटर र माथिल्लो स्टेसन ९४० मिटरको उचाइमा रहेको छ ।सातवटै प्रदेशमा केबलकार सञ्चालन गर्ने योजनामा रहेको आईएमई ग्रुपको यो तेस्रो केबलकार हो
