मंगलवार, १८ चैत्र, २०८१
मंगलवार, १८ चैत्र, २०८१
राष्ट्रिय सन्देश संबाददाता, बुधबार, १२ चैत्र, २०८१
अमृृत अधिकारी, १३ चैत २०८१, पाल्पा । हलगोरु पाल्ने किसानलाई प्रोत्साहन गर्न यहाँको पालिकाले अनुदान दिने तयारी गरेको छ । जिल्लाको रिव्दीकोट गाउँपालिकाले हल गोरु पालेर कृषि पेशामा लागेका किसानलाई प्रोत्साहन गर्न भन्दै नगद अनुदान दिने तयारी गरेको हो ।
अनुदानका लागि गाउँपालिकाले आठ वटै वडाका २९८ किसानलाई छनौट गरेको छ । गत वर्ष वडा नं. १ का हल गोरु पाल्ने किसानलाई गाउँपालिकाले दुई हजार पाँच सय रुपियाँदेखि पाँच हजार रुपियाँसम्म अनुदान दिएको थियो ।
यो वर्ष पालिकाका आठ वटै वडाका २९८ जना हाल गोरु पाल्ने किसानलाई प्रोत्साहन गर्न अनुदान दिने तयारी भइरहेको गाउँपालिकाका अध्यक्ष नारायणबहादुर कार्कीले जानकारी गराए । गाउँमै बसेर कृषि पेशामा आवद्ध किसानलाई हौसला प्रदान गर्न नगद अनुदानको व्यवस्था गरिएको कार्कीले बताए । यो वर्ष कृषि पेशामा आबद्ध हुन रुचि भई नयाँ हलगोरु किनेर ल्याउने किसानले पाँच हजार र पुराना किसानले दुई हजार पाँच सय रुपियाँ पाउने जानकारी गराए ।
अनुदान पाउने किसानले पालिकामा निवेदन दिइसकेका छन् । निवेदन आएका किसानमध्ये अनुगमनपछि अनुदान दिने अन्तिम निर्णय गरिने गाउँपालिकाका प्रवक्ता प्रकाश रायमाझीले जानकारी दिए ।
गाउँपालिकाले बसाइसराई तीव्र भएको भन्दै त्यसलाई रोक्न पनि किसानलाई प्रोत्साहन गर्न यस्तो कार्यक्रम ल्याएको जनाएको छ ।
हलगोरु पाल्ने किसान छनौट गरेर दानामा अनुदान दिने तयारी भइरहेको पालिकाका प्रमुख प्रशासकीय अधिकृत मणीप्रसाद खनालले जानकारी दिए ।
हल गोरु पालेवापत अनुदान पाउनका लागि वडा नं. १ का २५ जना, वडा नं. २ का छ जना, वडा नं. ३ का चार जना, वडा नं. ४ का २८ जना किसान छनौट भएका छन् ।
यस्तै वडा नं. ५ का १२, वडा नं. ६ को ९२, वडा नं. ७ का ३३ जना र वडा नं. ८ को एक सय जना किसान छनौट भएको गाउँपालिकाले जनाएको छ ।
