मंगलवार, १२ श्रावण, २०८३
मंगलवार, १२ श्रावण, २०८३
राष्ट्रिय सन्देश संबाददाता, आईतवार, १० श्रावण, २०८३
२०८३ साउन १०, काठमाडौँ। देशकै पहिलो आधुनिक सुरुङमार्ग, नागढुंगा सुरुङमार्गको भोलि औपचारिक रुपमा उद्घाटन हुने भएको छ । ऐतिहासिक परियोजनाको उद्घाटनपछि सुरुमा आकस्मिक सवारीलाई मात्र प्रवेश दिने आयोजना प्रमुख सौजन्य नेपालले जानकारी दिए ।
उनका अनुसार उद्घाटन भएलगत्तै सबै प्रकारका सवारी साधनका लागि यो मार्ग तुरुन्तै खुला हुने छैन । बरु यसलाई सुरक्षित र व्यवस्थित बनाउन चरणबद्ध रुपमा सञ्चालनमा ल्याइनेछ ।
आयोजना प्रमुख नेपालले पहिलो चरणमा एम्बुलेन्स र सुरक्षा निकायका सवारी साधन जस्ता आपतकालीन एवं अत्यावश्यक सवारी साधनहरुलाई मात्र सुरुङमार्ग प्रयोग गर्न दिइने योजना रहेको बताए ।यसरी सीमित संख्यामा सवारी साधन चलाएर सुरुमा त्यहाँको सुरक्षा स्थिति र ट्राफिक व्यवस्थापनको गहन अध्ययन गरिनेछ ।
सबै गाडीहरू एकै पटक सुरुङभित्र प्रवेश गराउँदा व्यवस्थापनमा चुनौती थपिन सक्ने भएकाले सुरक्षालाई नै मुख्य प्राथमिकतामा राखेर यस्तो रणनीति अपनाइएको नेपालले बताए ।
सुरुङमार्गमा अत्यावश्यक सवारी साधन चलाएर गरिने यो परीक्षण अवधि करिब एक हप्तादेखि १० दिनसम्मको हुन सक्नेछ ।यद्यपि, यदि प्राविधिक तयारी र सुरक्षा जाँचहरु अपेक्षा गरेभन्दा चाँडो सम्पन्न भएमा यो भन्दा छिटो पनि अन्य सवारीका लागि मार्ग प्रशस्त हुने छ ।
यो परीक्षण अवधिभर सुरुङमार्ग प्रयोग गर्ने आपतकालीन सवारी साधनहरूले कुनै पनि प्रकारको दस्तुर वा टोल शुल्क तिर्नु पर्ने छैन ।अत्यावश्यक सवारी साधनको सफल परीक्षण र सुरक्षा सुनिश्चितता पछि मात्र सर्वसाधारणका सवारी साधनहरु क्रमिक रुपमा भित्रिन पाउनेछन् ।
यस प्रक्रियामा सुरुमा साना सवारी साधनलाई एकतर्फी रुपमा सञ्चालन गर्न सकिने र त्यसपछि मात्र बस लगायतका ठूला सार्वजनिक सवारी साधनहरूलाई अनुमति दिइने तयारी भइरहेको छ ।
