मंगलवार, १७ असार, २०८२
मंगलवार, १७ असार, २०८२
राष्ट्रिय सन्देश संबाददाता, शनिबार, १८ जेष्ठ, २०८२
१७ जेठ २०८२, काठमाडौं । गएरातीको अविरल वर्षाका कारण अवरुद्ध भएको कोसी राजमार्ग एकतर्फी संचालनमा आएको छ । शनिबार साँझ ६ः३० बजे मुलघाटको अवरुद्ध सडक एकतर्फी सुचारु भएको जिल्ला प्रहरी कार्यालय धनकुटाले जनाएकाे छ ।
साँगुरीगढी गाउँपालिका-६ स्थित फेदी मूलघाटमा खोलाले सडक बगाएपछि राजमार्ग आज बिहानदेखि अवरुद्ध भएको हो । अस्थायी डाइभर्सन गरेर आज साँझदेखि एकतर्फी सवारी सञ्चालन गरिएको कोशी प्रदेश प्रहरी कार्यालयका प्रवक्ता भीमबहादुर दाहालले जानकारी दिए।
सडक अवरुद्ध हुँदा धरानतर्फ आउने र धनुकुटातर्फ जाने सवारीसाधन बाटोमा अलपत्र परेका थिए । ती सवारीसाधनका यात्रीलाई नेपाल प्रहरी तथा नेपाली सेनाको सहयोगमा वैकल्पिक मार्गबाट गन्तव्यतर्फ पठाइएको थियो ।
सडक अवरुद्ध हुँदा कोशी राजमार्ग र तमोर करिडोर भएर पूर्वी तराईको धरानबाट भेडेटार, धनकुटा हुँदै भोजपुर, सङ्खुवासभा, ताप्लेजुङ र पाँचथर जाने सवारी आवागमन पूर्ण रूपमा ठप्प भएको थियो ।
बिहान करिब ६ बजेतिर अबिरल परेको बर्षाको कारण धनकुटाको साँगुरीगढी गापा- ६ कोशी राजमार्गस्थित फेदी भन्ने स्थानमा लेउती खोलामा आएको बाढीले १०० मिटरभन्दा बढी सडक कटान गरेर बगाएको थियो ।
सडक बगाएपछि सो क्षेत्रमा यातायात १२ घण्टादेखि अबरुद्ध भएको थियो ।
