शुक्रबार, २ आश्विन, २०८३
शुक्रबार, २ आश्विन, २०८३
राष्ट्रिय सन्देश संबाददाता, १९ घण्टा पहिले
२०८३ असोज १, काठमाडौँ I नेपाली कांग्रेसका सभापति गगनकुमार थापाले पार्टीको बृहत्तर हितका लागि लचकता अपनाएर आफू अघि बढ्न तयार रहेको बताएका छन् । बिहीबार पार्टी केन्द्रीय कार्यालयमा बसेको केन्द्रीय समितिको बैठकलाई सम्बोधन गर्दै उनले आन्तरिक मतभेदलाई थाती राखेर पार्टीलाई एकताबद्ध बनाउनुपर्नेमा जोड दिए ।
थापाले कसले आफ्नो अडान छाड्यो वा कसले जित्यो भन्ने रूपमा नलिन आग्रह गर्दै सबै तह र वर्गका व्यक्तित्वहरूलाई समेटेर अगाडि बढ्ने प्रतिबद्धता जनाएका छन् । बैठकमा बोल्दै सभापति थापाले निवर्तमान सभापति शेरबहादुर देउवा पक्ष र सम्पूर्ण असन्तुष्ट नेताहरूलाई पार्टी एकताको अभियानमा जोडिन अपिल गरे ।
तोकिएको समयमै महाधिवेशन सम्पन्न गरेर जनतासामु जानु अनिवार्य रहेको उल्लेख गर्दै उनले पूर्वसभापतिको हैसियतमा देउवाले महाधिवेशनको उद्घाटन गर्दा पार्टीको सम्मान बढ्ने धारणा राखे । साथै, विगतमा विभिन्न कारणले रिसाएर वा असन्तुष्ट भएर कांग्रेस छाडेका कार्यकर्ता तथा नेताहरूलाई पुनः जोडेर बलियो कांग्रेस निर्माण गर्नुपर्नेमा उनले जोड दिए ।
