शुक्रबार, २३ आश्विन, २०८३
शुक्रबार, २३ आश्विन, २०८३
राष्ट्रिय सन्देश संबाददाता, ७ घण्टा पहिले
२०८३ असोज २२ काठमाडौँ । आगामी चाडपर्वका बेला वायुसेवा कम्पनीहरूले मनोमानी रूपमा टिकटको मूल्य बढाएको गुनासो बढेपछि सरकारको पहलमा हवाई भाडादर घट्ने भएको छ ।
प्रधानमन्त्री वालेन्द्र शाहको निर्देशन र संस्कृति, पर्यटन तथा नागरिक उड्डयनमन्त्री खडकराज पौडेल (गनेश)को सक्रियतापछि आन्तरिक वायुसेवा सञ्चालकहरू स्वीकृत भाडादरभन्दा सस्तोमा टिकट बिक्री गर्न तयार भएका हुन् ।
नजिकिँदो चाडपर्वको मौका छोपेर हवाई भाडादर बढाएको भन्ने गुनासो आएपछि प्रधानमन्त्री शाहले यसबारे चासो देखाएका थिए । त्यसपछि नेपाल नागरिक उड्डयन प्राधिकरण (क्यान)ले आज सम्बन्धित आन्तरिक वायुसेवा कम्पनीका पदाधिकारी तथा प्रतिनिधिसँग छलफल गरेको हो । उक्त छलफलपछि स्वीकृत भाडादरभन्दा सस्तोमा टिकट बिक्री वितरण गर्ने/गराउने विषयमा वायुसेवा कम्पनीहरू सहमत भएका क्यानले जनाएको छ ।
सहमतिअनुसार अब वायुसेवा कम्पनीहरूले सस्तो मूल्यको भाडादरसम्बन्धी विवरण आफ्ना आधिकारिक बिक्री प्लेटफर्म तथा वेबसाइटहरूमा प्रकाशन गर्ने सहमति भएको छ । चाडपर्वमा घर फर्किने यात्रुलाई राहत दिन सरकारले यो कदम चालेको हो ।
