शनिबार, २० भाद्र, २०८३
शनिबार, २० भाद्र, २०८३
राष्ट्रिय सन्देश संबाददाता, ११ घण्टा पहिले
२०८३ भदौ १९ काठमाडौं । नेकपा एमालेका अध्यक्ष केपी शर्मा ओलीले बाढीपीडितका लागि पठाइने राहत रकम सरकारी कोषमा जम्मा गर्नुभन्दा सिधै पीडितको हातमा पुर्याउनु अहिलेको पहिलो प्राथमिकता हुनुपर्ने बताएका छन् ।
शुक्रबार पार्टी कार्यालय च्यासलमा रसुवाका बाढीपीडितका लागि राहत सामग्री हस्तान्तरण गर्दै उनले सरकारी कोषमा रकम दाखिला गर्दा प्रक्रियामै थन्किने र पीडितले समयमा सहयोग नपाउने दाबी गरे। राहत रकम पहिला पीडित जनताको हातमा पुर्याएपछि मात्र आफ्नो अवस्था र हैसियत अनुसार सरकारी कोषमा दाखिला गर्न सकिने उनको भनाइ थियो ।
कार्यक्रमका क्रममा अध्यक्ष ओलीले विपद्को समयमा देखिएको ‘ग्रिन आर्मी’ नामक समूहको अस्तित्व र भूमिकामाथि पनि गम्भीर प्रश्न उठाए । उक्त संस्था २०७२ को भूकम्प, कोभिड महामारी वा विगतका बाढीपहिरोजस्ता विपद्मा नदेखिएको उल्लेख गर्दै उनले गत वर्ष राजनीतिक आन्दोलनका नाममा भएका तोडफोड, लुटपाट, आगजनी र हत्याका घटनामा सो समूह आफ्नो पोशाकमा नदेखिए पनि अन्य रूपमा संलग्न थियो कि भन्नेबारे नेपाली जनताले विचार गर्नुपर्ने बताए ।
यसैगरी, नेपालले वातावरणीय विनाशमा भूमिका नखेले पनि त्यसको प्रत्यक्ष मार र क्षति भोग्नुपरेको भन्दै उनले संयुक्त राष्ट्रसंघलगायतका अन्तर्राष्ट्रिय मञ्चहरूबाट विकसित देशहरूसँग दृढतापूर्वक क्षतिपूर्ति माग गर्नुपर्नेमा जोड दिए ।
