शनिबार, २२ चैत्र, २०८१
शनिबार, २२ चैत्र, २०८१
राष्ट्रिय सन्देश संबाददाता, आईतवार, १८ फाल्गुन, २०८१
फागुन १८, २०८१ ,काठमाडौँ । राष्ट्रिय स्वतन्त्र पार्टीका केन्द्रीय सदस्य मोहन थापा अमेरिकामा पक्राउ परेका छन् । अमेरिकी आप्रवासन र भन्सार प्रवर्तन (आइस) ले रास्वपाका सभापति रवि लामिछानेका विश्वासपात्र मानिने थापालाई एक साता अगाडि पक्राउ गरेको बताइएको छ ।नेपालबाट अमेरिका जाँदै गर्दा उनलाई पेन्सिल्भेनियाको फिलाडेल्फिया अन्तर्राष्ट्रिय विमानस्थलमा पक्राउ गरिएको हो । उनी अहिले फिलाडेल्फिया संघीय हिरासत केन्द्रमा रहेका छन् ।
प्राप्त जानकारी अनुसार पार्टीको वेबसाइटबाट पनि केन्द्रीय सदस्यको सूचीबाट थापाको नाम हटाइएको छ । रास्वपाका सदस्य थापाले अमेरिकाको बाल्टिमोरमा रवि लामिछानेका लागि चन्दा उठाउने कार्य गरिरहेको बिषयलाई लिएर बिबादमा परेका थिए । रास्वपाका तत्कालीन सांसद डा. ढाकाकुमार श्रेष्ठले आफूलाई मन्त्री बनाइदिने भन्दै थापाले पैसा मागेको दाबी गरेका थिए । थापाले लामिछानेको नाम लिएर पार्टीको स्थापनाकालदेखि नै ठगी गर्दै आएका घटना सार्वजनिक हुँदै आएका छन् ।
अमेरिकामा पक्राउ परेको घटना सार्वजनिक भए पनि रास्वपाले भने औपचारिक रुपमा उनीबारे कुनै निर्णय लिएको छैन । मेरील्याण्ड बाल्टिमोरमा बस्दै आएका उनी बाल्टिमोर एसोसिएसन अफ नेप्लीज इन अमेरिका (बाना) का संस्थापक अध्यक्ष हुन्। थापा यस अगाडि पनि मेरील्याण्डमा सवारी लाइसेन्स दुरुपयोग अभियोगमा जेल बसेका व्यक्ति हुन्। थापासँग अमेरिकी ग्रीन कार्ड रहेको बताइन्छ । उनि संग ग्रीन कार्ड भएपनि रास्वपा केन्द्रीय सदस्य बनेका थिए ।
