सोमबार, २५ श्रावण, २०८३
सोमबार, २५ श्रावण, २०८३
राष्ट्रिय सन्देश संबाददाता, ३ घण्टा पहिले
०८३ साउन २५ ,काठमाडौँ । राष्ट्रिय प्रजातन्त्र पार्टी (राप्रपा) का सांसद ज्ञानबहादुर शाहीले आफूले जीवनमा मदिरा सेवन गरेको प्रमाणित भए प्रतिनिधिसभा सदस्यबाट राजीनामा दिने बताएका छन् ।
सोमबार प्रतिनिधि सभाको बैठकमा बोल्दै शाहीले आफूविरुद्ध सामाजिक सञ्जाल तथा अन्य माध्यमबाट गम्भीर र भ्रामक आरोपहरू प्रचार भइरहेको भन्दै त्यसको खण्डन गर्न संसद्मै यस्तो घोषणा गरेका हुन् ।
आफूमाथि मदिरा सेवन गरी सार्वजनिक अभिव्यक्ति दिने गरेको तथा अश्लील भिडियोसँग जोडिएका आरोप लगाइएको उनले बताए । ती आरोपको तथ्य परीक्षण गर्न संसद्को स्वास्थ्य संयन्त्रअन्तर्गत चिकित्सकसहितको टोली बनाएर आफ्नो स्वास्थ्य परीक्षण गर्न उनले सभामुख र संसद्समक्ष आग्रह गरे ।
शाहीले सामाजिक सञ्जालमा भेटिएको अर्कै व्यक्तिको अश्लील भिडियोलाई आफ्नो भन्दै प्रचार गरिएको दाबी गरे। उक्त भिडियो आफ्नो भएको प्रमाणित भए आफूले राजनीतिक जीवनबाटै संन्यास लिने घोषणा गरे ।
उनले उक्त भिडियो आफ्नो भए अनुसन्धानबाट प्रमाणित गर्न चुनौती दिँदै आफू राजनीतिक जीवनबाट संन्यास लिन तयार रहेको बताए । तर, भिडियो आफ्नो नभएको अवस्थामा गलत सूचना फैलाउने व्यक्तिमाथि प्रहरीले कारबाही गर्नुपर्ने उनको माग छ । यस विषयमा प्रहरीमा निवेदनसमेत दिइसकेको उनले जानकारी दिए ।
‘यदि त्यो भिडियो मेरो होइन, गलत सूचना दिइयो भने प्रहरीले कारबाही किन गरेको छैन ? सरकारले त्यस्ता व्यक्तिलाई कारबाही किन गरेको छैन ? यसको जवाफ माग्छु म। किनभने प्रहरीलाई निवेदन दिइसकेका छौँ,’ शाहीले भने।
उनले सामाजिक सञ्जालमा फैलाइएका आरोप र सामग्रीका कारण आफ्नो चरित्र तथा राजनीतिक प्रतिष्ठामाथि प्रश्न उठाइएको भन्दै त्यसको निष्पक्ष छानबिन गरी दोषीमाथि कानुनी कारबाही गर्न माग गरे ।
