मंगलवार, २ असार, २०८३
मंगलवार, २ असार, २०८३
राष्ट्रिय सन्देश संबाददाता, १ घण्टा पहिले
२०८३ असार ०२, काठमाडौं । देशका विभिन्न स्थानमा परेको वर्षा, बाढी, पहिरो र सडक मर्मतका कारण केही मुख्य राजमार्गहरू प्रभावित भएका छन् ।
नेपाल प्रहरीको पछिल्लो तथ्याङ्क अनुसार चन्द्रागिरि नगरपालिका–९, देउराली देवीस्थानमा पहिरो गएका कारण सतुङ्गल–चित्लाङ सडक खण्ड पूर्ण रूपमा अवरुद्ध छ । मर्मत कार्यका लागि यो बाटो १ महिनाका लागि बन्द रहने जानकारी दिइएको छ ।
मकवानपुरको इन्द्रसरोवर गाउँपालिका–२ र ४ को महालक्ष्मी क्षेत्रमा सडक मर्मत कार्य भइरहेकाले कुलेखानी–फाखेल–हुमाने–फर्पिङ सडक पनि १ महिनाका लागि पूर्ण रूपमा बन्द गरिएको छ ।
ईलामस्थितमेची कोरिडोर इलाम नगरपालिका–९, पुवाखोलामा बाढीका कारण सडक पूर्ण रूपमा अवरुद्ध छ। तत्कालका लागि मेची राजमार्गलाई वैकल्पिक बाटोको रूपमा प्रयोग गर्न सकिनेछ ।
सम्भावित बाढीको जोखिमलाई मध्यनजर गर्दै बीपी राजमार्गको खुर्कोट–नेपालथोक–कटुञ्जेबेंसी चल्ने सम्पूर्ण सवारी साधनहरू सञ्चालनमा रोक लगाइएको छ ।
मध्य पहाडी लोकमार्ग अन्तर्गत भोजपुरको बोखिम र पाँचथरको दोभानमा बाढीका कारण सडक एकतर्फीमात्र सञ्चालनमा छ । पूर्व–पश्चिम लोकमार्ग अन्तर्गत महोत्तरीको बर्दिवास–५, टुटेश्वर खण्डमा सडक एकतर्फी सुचारु रहेको छ ।
